ناسح عبدولرەحیم-هەڵەبجەى شەهید. [e-mail]

مەسعود بەرزانى و بەرپرسانى کورد سەفەرەکانیان بۆ بەغدا لەپاى چییە

ناسح عبدولرەحیم-هەڵەبجەى شەهید
[e-mail]

جاران خەڵکى کوردستان بۆ بینینى بەغداىپایتەخت یان بۆ چارەسەرى نەخۆشى یان بۆ کرێکارى یان بۆ مەبەستێکى تایبەت ڕوویان لە بەغداد دەکردوو دەچوونە ئەو شارە،،ئەوکات بەغداد شارێک بوو ئەوانەى سەفەریان بۆ دەکرد بڕێک پارەیان لەگەڵ خۆیان دەبرد و لەوێ سەرفیان دەکرد،بە ئارامى و دڵخۆشیەوە کاتەکانى خۆیان لەوێ بەسەر دەبرد و کارو کاسبى خۆیان دەکرد و بە بێ ترس و دڵە ڕاوکێ دەگەڕانەوە بۆ کوردستان،جاران کوردێک نەبوو بەبیریدا بێت لەلایەن عەرەبێکەوە پەلامار بدرێت و هەڕەشەى لێبکرێت و  بکوژرێت،چونکە ئەوانەى جاران مسافیرى بەغداد بوو کەسانێکى بێوەیى و بێزەرەرو زیان بوون،خەڵکانێک بوون نەڕۆشتبوون بۆ زوڵم کردن و نەڕۆشتبوون بۆ زەوتکردنى مافى هیچ کەسێک ،بۆیە هیچ کەسێکیش بیرى لەوە نەدەکردەوە ئازارى کوردێکى موسافیر بدات،بەڵام موسافیرەکانى ئێستا نە بۆنەخۆشى و نە بۆ دیتنى ئەو شارە و نەبۆ.... ڕوو لەو شارە ناکەن،ئەوانەى ئێستا ڕوو لەو شارە دەکەن یەک باوەڕیان هەیە ئەویش ئەوەیە "هیى خۆم ئەخۆم بەشەکەى تۆش ئەخۆم"ئەو موسافیرانەى ئێستا بەناوى نوێنەرایەتى خەڵکى کوردستانەوە،وەک بەرپرسى میللەت ساڵانە چەند جارێک سەفەرى بەغداد دەکەن بە چاوێکیترەوە لێیان ئەڕوانرێت،چونکە بەغداد باش ئەوە دەزانێت،ئەوانەى بەناوى میللەتى کوردەوە هاتوونەتە بەغداد بۆچ مەبەستێک لە پێناوى چیدا هاتوونەتە بەغداد.
ئەگەر بە وردى لە پەیوەندى نێوان هەریم و بەغداد بڕوانین لەماوەى پێنج ساڵى ڕابردوودا،هەموو ئەو کێشمەکێش و هێنان و بردنى بەرپرسانى هەرێم لە کوردستانەوە بۆ بەغداد لە ڕووکەشدا خۆى لەوەدا دەبینێتەوە کە بۆچارەسەرکردنى دۆزى ڕەواى میللەتى کورد لە هاتن و چووندان ،بەڵام ئەى ئایا بۆ ڕۆژ لە ڕۆژ لە لێوارى کێشەکانەوە بەرەو قوڵاى کێشەکان دەڕۆین؟پێم سەیرە ڕۆژانە لە ڕاگەیاندنەکانى سەر بەدەستەڵاتەوە ئەوەمان دەدەن بە گوێدا کەوا سەفەرى بەرپرسانى هەرێم بۆ بەغدا بۆ چارەسەرکردنى گرفتەکانى خەڵکى کوردستانە؟ئەگەر ڕاپرسیەک بکەیت ئێستا لە ناو خەڵکى و کوردستاندا ئەتوانم بڵێٍم زۆرێک لە خەڵک باوەڕیان وای ئێمە کٍێشەکەمان لە ماڵى خۆماندایە و چارەسەرەکەشى هەر لەماڵىخۆماندا دەکرێت ئیتر ئەوانەى دەڕۆن بۆ بەغداد بەناوى چارەسەر کردنى کێشەکانى میلەت،لە ڕاستیدا ڕۆشتن و هاتنەوەیان هیچ پەیوەندیەکى نییە بە مەسەلەى میللەتەوە بەڵکو ئەوان لە پێناوى دەست کەوتنى ئیمتیازاتى بوجە و نەوت و پۆست و نەسریەو موچەى ملیۆنى و ئەو جۆرە بابەتانەیە:

پەشێوى شاعیر دەڵێت:
 تا پرتەقاڵ ومۆزو سێو مابن
کۆبوونەوەکان قەت تەواو نابن
گەر دەتانەوێت
ئەو سیسەرکانە وەک کەو کەوى کەن
لە بەغداد چۆنن
 لە کوردستانیش سەرى سەقەتیان وا پێنەوى کەن
توخوا ئەم جارە کە کۆبوونەوە
جەرەس ومیوەى سەر مێزەکانیان هەموو وەلا نێن
 ئێسک و پرۆسکى ئەنفالەکانیان لەبەر دەم دانێن..........

ئەم وتارە لە ڕۆژنامەى ئاڵاى ئازادى ژمارە(  554)بڵاو بووتەوە